今日係一戰結束100週年，新聞話法國嗰邊近一星期陸續舉行活動，悼念依件歷史大事。其實一戰中有唔少國家參戰，不過數到最血腥一役，不得不提索姆河戰役。話說喺1916年6月，英法兩國希望逼退德軍，於是喺法國北部索姆河地區向德軍發動攻勢。喺呢場戰役，英法無論喺人力同物力都佔有優勢，不過最終都係賠上大量士兵嘅寶貴性命。

當時負責指揮英國作戰嘅黑格，原本諗住用幾日時間密集轟炸德軍嘅防禦設施，然後就用75萬重兵突破德軍防線。不過轟炸似乎作用不大，德軍嘅設施損傷有限。英軍喺7月1號如常發動攻擊，唔少士兵聽從指揮，慢步走過無人地帶，點知原來直接行入咗德軍機槍攻擊範圍，導致大量士兵喪命。有德國士兵戰後憶述，對於慢慢行嘅敵軍士兵感到驚訝，德軍開火時甚至無須瞄準，只是不停上彈同開槍，「每次開火就有數百人倒下」。單單响交戰第一日，英軍已經有超過兩萬個士兵陣亡、四萬人受傷，當中大多數都係首次上戰場嘅新丁。

呢場戰役最終打咗超過4個月，英法聯軍只不過係推進咗12公里，但各方陣營共有超過一百萬人傷亡，戰況極其慘烈。值得一提嘅喺，英國於索姆河戰役中首次使用坦克，係「陸戰霸王」史上初次投入戰場，為德軍帶嚟極大震撼，其後更激發雙方陣容展開軍備競賽。

圖片嚟自網絡。